नगरविकासमंत्री एकनाथ शिंदे यांच्यामुळे पोलिसांना मिळणार साडेचार हजार घरे

ठाणे - सिडकोच्या माध्यमातून पोलीसांना साडेचार हजार घरे उपलब्ध करून देण्यात येणार आहेत. परवडणा-या घरांच्या योजनेत पोलीसांसाठी राखीव घरं ठेवण्याचा निर्णय नगरविकास मंत्री एकनाथ शिंदे यांनी घेतला. त्यामुळे सिडकोच्या आजवरच्या इतिहासात पहिल्यांदाच पोलीसांसाठी विशेष बाब म्हणून घरं राखीव ठेवण्यात आली आहेत. मुंबई महानगर परिसरात पोलिसांच्या घरांचा प्रश्न बिकट असून गेली अनेक वर्षे प्रयत्न करूनही पोलिस कर्मचाऱ्यांना हक्काची घरे उपलब्ध होताना अडथळे येत आहेत. आता शिंदे यांच्या या निर्णयामुळे घरांच्या ऑनलाइन नोंदणीला उद्यापासून सुरुवात होत आहे. 

मुख्यमंत्री उद्धव ठाकरे यांच्या वाढदिवसाचे औचित्य साधून एका विशेष ऑनलाइन सोहळ्यात या नोंदणीला सुरुवात होणार आहे. नवी मुंबईत सुरू असलेल्या गृहप्रकल्पांमध्ये एकूण ४ हजार ४६६ सदनिका पोलिसांसाठी उपलब्ध करून देण्यात आल्या आहेत. प्रधानमंत्री आवास योजनेंतर्गत आर्थिकदृष्ट्या दुर्बल घटकांसाठी आणि अल्प उत्पन्न गटासाठी या सदनिका उपलब्ध असून केवळ मुंबई महानगर कार्यक्षेत्रात कार्यरत असलेल्या पोलिस कर्मचाऱ्यांसाठी त्या राखीव आहेत. मासिक उत्पन्न २५ हजार रुपयांपर्यंत आणि मासिक उत्पन्न ५० हजार रुपयांपर्यंत अशा दोन गटांमध्ये या सदनिका असून त्यांची किंमत किमान १९ लाख ते कमाल ३१ लाख रुपये इतकी आहे. 

ऑनलाइन नोंदणी प्रक्रिया २७ ऑगस्ट पर्यंत सुरू असून तर ऑनलाइन अर्ज भरण्याची प्रक्रिया २८ जुलै ते २८ ऑगस्ट या कालावधीत चालणार आहे. पोलिसांच्या घरांचा प्रश्न किती बिकट आहे, याची सर्वांनाच कल्पना आहे. राज्यात परवडणाऱ्या घरांची निर्मिती करत असताना पोलिसांसाठी घरे राखीव ठेवण्याचा निर्णय घेतला. सेवा काळात सरकारी घरांमध्ये राहणाऱ्या पोलिसांच्या कुटुंबियांवर निवृत्तीनंतर बिकट परिस्थिती ओढवते. मुंबईत घर घेणे परवडत नाही. त्यामुळेच परवडणाऱ्या घरांच्या योजनेत पोलिस कर्मचाऱ्यांसाठी घरे राखीव ठेवण्याचा निर्णय घेण्यात आला असून हक्काची घरे उपलब्ध होणार असल्यामुळे पोलिसांची मोठी चिंता दूर होईल असं एकनाथ शिंदे यांनी सांगितलं.