ज्या भुमीवर तिरंगा फडकायला पाहिजे तेथे तो फडकत नाही- खासदार संजय राऊत

ठाणे : शिवसेनेने पुन्हा एकदा भाजपवर जोरदार हल्लाबोल केला आहे. ज्या भूमीवर तिरंगा फडकायला पाहिजे,तेथे तो फडकत नाही.हा भाजपचा पराभव आहे.काश्मीरातील अनुच्छेद ३७० हटवल्यावर नक्की बदलले काय,असा सवाल शिवसेनेचे नेते खासदार संजय राऊत यांनी भाजपला विचारला आहे.केवळ मुंबईला पाक व्याप्त काश्मीर म्हणणाऱ्या नटीला संरक्षण आणि आपला तिरंगा असुरक्षित,असेच हे चित्र दिसत आहे.काश्मीरात सद्या राष्ट्रपती राजवट आहे.म्हणजे तेथे दिल्लीचा हुकूम चालतो,पण लाल चौकात तिरंगा फडकवणे हा गुन्हा ठरला.याला काय म्हणावे,असे शिवसेनेने म्हटले आहे.हा भाजपचा झालेला पराभव आहे, अशी खरमरीत टीका शिवसेना नेते खासदार संजय राऊत यांनी केली आहे.

काश्मीर येथेच तिरंग्याचा अपमान होतो.तेथील अनुच्छेद ३७० हटवले आहे.तरीही तेथे बदल काय झालेला दिसत नाही? हिंदुत्वाचा संबंध राष्ट्रीयत्वाशी येतो. एखाद्या भूमीवर तिरंगा फडकवण्यास बंदी आहे याचा सरळसोट अर्थ असा की,त्या भूमीचे आम्ही मालक नाही!त्या भूमीवर दुसऱ्याच कुणाचा तरी हुकूम चालत आहे.ते हुकूमबाज एकतर दहशतवादी आहेत अथवा परके आहेत. मुंबईत आजही तिरंगा फडकत आहे.म्हणजे हा भाग पाकड्यांचा नाही.जेथे पाकड्यांची मिजास चालते तेथेच तिरंग्याचा अपमान होतो.नकट्या नटीने लाल चौकातील न फडकलेल्या तिरंग्यासाठी संतापाच्या ठिणग्या उडवाव्यात. खरी मर्दानगी आणि मर्दानी तेथेच आहे,असा टोला कंगनाला नाव न घेता खासदार संजय राऊत यांनी लगावला आहे.

काश्मीरात नक्की काय सुरू आहे याबाबत शंकाकुशंकांना खतपाणी मिळणाऱ्या घटना,घडामोडी रोज घडताना दिसत आहेत. काश्मीरबाबत देशवासीयांच्या भावना तीव्र आहेत.काँग्रेसच्या काळात काश्मीर हातातून गेलेच होते ते भाजपने परत मिळवले. हे जे सांगितले जाते,ते खरे असेल तर श्रीनगरच्या लाल चौकात तिरंगा फडकवण्यास विरोध का करण्यात आला?याचे उत्तर देशाला मिळायला हवे, असा रोखठोक प्रश्न शिवसेनेने उपस्थित केला आहे.तिरंगा फडकवणाऱ्या भाजप कार्यकर्त्यांना रोखले. काश्मीर हा हिंदुस्थानचाच अविभाज्य भाग आहे,हे सिद्ध करण्यासाठीच मोदी सरकारने अनुच्छेद ३७० हटवून काश्मीरच्या पायांतील गुलामीच्या बेड्या तोडून फेकल्या. त्याबद्दल सगळ्यांनीच त्यांच्यावर कौतुकाचा वर्षाव केला.

अनुच्छेद ३७० हटवून भारतमातेचा गुदमरलेला श्वास मोकळा केला.हे सर्व मोदी व शाह यांचे राज्य दिल्लीत असल्यामुळेच घडले, पण अनुच्छेद ३७० हटवूनही भाजप कार्यकर्त्यांना चारएक दिवसांपूर्वी श्रीनगरच्या लाल चौकात तिरंगा फडकवता आला नाही. लाल चौकात तिरंगा फडकवण्यास गेलेल्या भाजप कार्यकर्त्यांना काश्मीरच्या पोलिसांनी रोखले आणि बंदी बनवले.हे चित्र काय सांगते?म्हणजेच काश्मीरची स्थिती अजूनही सुधारलेली नाही.जे बरे दिसत आहे तो फक्त वरवरचा मेकअप आहे,असा हल्लाबोल शिवसेनेने केला आहे.