भिवंडीतील राष्ट्रवादी अध्यक्ष व पदाधिकाऱ्यांचा वाद प्रदेश समितीकडे ; पदाधिकाऱ्यांच्या निलंबनाला स्थगिती
भिवंडी: शहर जिल्हा राष्ट्रवादीचे उपाध्यक्ष जावेद फारुकी, पदाधिकारी ईवाद नोमानी व हारुन खान यांच्यावर जिल्हा अध्यक्ष भगवान टावरे यांनी केलेली निलंबनाची कारवाई पक्षाच्या दृष्टीने असंवैधानिक व पक्षाच्या नियमाला धरून नसल्याचे सांगत राष्ट्रवादीच्या शिस्त पालन समितीचे सदस्य तथा प्रदेश सरचिणीस माजी मंत्री नसीम सिद्दीकी यांनी तिघा पदाधिकाऱ्यांचे निलंबन रद्द केले आहे.यामुळे भिवंडीतील राष्ट्रवादी पदाधिकाऱ्यांमध्ये अंतर्गत वाद असल्याचे समोर आले आहे.विशेष म्हणजे काही दिवसापूर्वीच भिवंडी शहरजिल्हा राष्ट्रवादी अध्यक्ष भगवान टावरे यांनी तिन्ही पदाधिकाऱ्यानी पक्ष विरोधी भूमिका व पक्षाच्या नियमाचे पालन केले असल्याचा आरोप करीत पक्षाच्या पदावरून तिघांना निलंबित केल्याचे एका पत्रकार परिषदेत जाहीर केले होते.
यावर निलंबन मागे घेण्यासाठी जावेद फारुकी, हारुन खान यांनी महाराष्ट्र प्रदेश सरचिटणीस व भिवंडी निरीक्षक माजी मंत्री नसीम सिद्दीकी यांच्याकडे धाव घेत अध्यक्ष भगवान टावरे यांनी केलेले निलंबन हे पक्षाच्या नियमानुसार नसल्याचे सांगत त्यांच्याकडे लेखी तक्रार दिली. या तक्रारीची गंभीरतेने दखल घेत प्रदेश सरचिटणीस नसीम सिद्दीकी यांनी भिवंडी शहरजिल्हा अध्यक्ष भगवान टावरे यांनी केलेल्या निलंबनाची कारवाई रद्द केली आहे.तसेच यावर नसीम सिद्दीकी यांनी सांगितले कि, जिल्हा अध्यक्ष यांना कुठल्याही पदाधिकारी व कार्यकर्त्याच्या विरोधात तक्रारी असतील तर पक्षाच्या शिस्त पालन समितीकडे त्या पदाधिकारी विरोधात तक्रार दिली पाहिजे होती. या समितीत पांच सदस्य असून समितीचे अध्यक्ष माजी मंत्री दांडेगांवकर आहेत. या समितीकडे तक्रार केल्यास पक्षातील दोन्ही पदाधिकाऱ्यांना एकत्र बसवून तक्रार ऐकल्यानंतर संबधित निर्णय प्रदेश अध्यक्ष जयंत पाटील यांच्याकडे लेखी स्वरूपात पाठविण्यात येते. त्यांच्या निर्देशानुसार संबंधित पदाधिकारी अथवा कार्यकर्ता यांच्यावर निलंबनाची कार्रवाई केली जात असल्याचे त्यांनी सांगितले.
त्यामुळे भिवंडी शहरजिल्हा अध्यक्ष भगवान टावरे यांनी केलेले तिन्ही पदाधिकाऱ्यांचे निलंबन पक्षाच्या नियमाने असंवैधानिक व बेकायदेशीर असल्याने निलंबन रद्द करण्यात येत असल्याचे सांगत तिन्ही पदाधिकारी आपआपल्या पदावर कायम राहणार असल्याचेही त्यांनी सांगितले एकंदरीतच राष्ट्रवादी स्थापनेपासून महाराट्राच्या सत्तेत असलेल्या राष्ट्रवादी पक्ष तत्कालीन युती सरकारच्या काळात ५ वर्ष सत्तेविना राहिल्याने अनेक दिग्गजांनी राष्ट्रवादीला गेल्या ५ वर्षाच्या काळात रामराम केल्याचे पाहवयास मिळत आहे.त्यामुळे आता पुन्हा सत्तेवर येताच स्थानिक पातळीवर पक्षातील पदाधिकाऱ्यांमध्ये अंतर्गत राजकारण सुरु झाल्याचे दिसून आले आहे
