धक्कादायक घटना.... मांत्रिकाच्या सांगण्यावरून विवाहितेला बेदम मारहाण करीत घरातून काढले
भिवंडी : मांत्रिकाने सांगितले तुमच्या सुनेला मुलबाळ होणार नाही.त्यामुळे मांत्रिकाच्या सांगण्यावरून सासरच्यांनी विवाहितेला बेदम मारहाण करीत तिला घरातून हाकलून दिल्याची धक्कादायक घटना समोर आली आहे. हि घटना भिवंडी तालुक्यातील देवरुंगपाडा येथे घडली आहे. याप्रकरणी पडघा पोलीस ठाण्यात विविध कलमानुसार सासरच्या मंडळीवर गुन्हा दाखल करून पोलिसांनी तपास सुरु केला आहे. तर बेदम मारहाणीत जखमी झालेल्या विवाहितेवर उल्हासनगरच्या मध्यवर्ती रुग्णालयात उपचार सुरू आहेत.
मिताली पाटील असे मारहाण झालेल्या विवाहितेचे नाव आहे.आपटी गावात राहणाऱ्या मितालीचे १५ जून २०२० रोजी तालुक्यातील देवरुंगपाडा येथे राहणाऱ्या देवेश पाटील याच्या सोबत लग्न झाले होते. मात्र लग्नाच्या १५ दिवसानंतर लगेच पतीचे मामा ,मामी आणि नवऱ्याने तिचा छळ सुरू केला.सासरच्याना एका मांत्रिकाने मितालीला मुलबाळ होणार नाही असे असे सांगितल्याने माझा छळ सुरू झाल्याचे मितालीने सांगितले.२४नोव्हेंबर रोजी रात्री मला एका चारचाकी गाडीत घालून बेदम मारहाण करीत माझ्या माहेरी आपटी या गावातील घरातील अंगणात टाकुन दिले.इतका अमानुष छळ करणाऱ्या सगळ्यांवर कठोर कारवाई व्हावी अशी मागणी मितालीने केली आहे.
या प्रकरणी सुरुवातीला टिटवाळा पोलिसांनी गुन्हा दाखल करून तो भिवंडी, पडघा पोलीस ठाण्यात वर्ग केला असून सासारच्यांच्या विरोधात भादवी कलम ४९८ (अ)मारहाण,धमकवणे या कलमानुसार पडघा पोलीस ठाण्यात गुन्हा दाखल करण्यात आला आहे.मात्र पोलिसांनी मितालीने सांगितलेल्या जबाबाप्रमाणे गुन्ह्याची नोंद केली नाही असा आरोप मितालीच्या भावाने केला आहे.या प्रकरणात सासरीच्या मंडळींना वाचवण्याचा प्रयत्न होत असून आम्हाला जीवे ठार मारण्याचा धमक्या दिल्या जात असल्याचे मितालीच्या भावाने सांगितले. तर पीडित अजून रुग्णालयात दाखल असून त्यांच्यावर उपचार सुरू आहेत. त्यामुळे पुन्हा त्यांचा जवाब घेऊन सखोल तपास करून पुढची कारवाई करू असे पडघा पोलीस ठाण्याच्या वरिष्ठ पोलीस निरीक्षक दिनेश कटके यांनी सांगितले असून या प्रकरणाची संपूर्ण माहिती घेऊन नंतर प्रतिक्रिया देऊ असे त्यांनी सांगितले.
